Paytaxtın 3-cü mikrorayon dairəsində “Mercedes” markalı avtomobilin sürücüsü maşından yola külli miqdarda zibil atıb. Bu haqda bu gün, 24 dekabr tarixində Avtosfer.az məlumat verib.
Bu hal arxadan hərəkət edən avtomobilin kamerasına düşüb. Videonu çəkən sürücü ona yaxınlaşaraq iradını bildirib və videonu paylaşacağı ilə bağlı xəbərdarlıq edib.
“Yol hərəkəti haqqında” qanununa əsasən, sürücü və sərnişinlərə nəqliyyat vasitəsindən zibil və ya digər əşyaları atmaq qadağandır. Bu qanun pozuntusuna görə İnzibati Xətalar Məcəlləsinin 327.1-ci maddəsinə uyğun olaraq 40 manat məbləğində cərimə nəzərdə tutulur.
