Bakıda yaşayış binalarının yaxınlığında yerləşən avtoyuma məntəqələri sakinləri narahat edir. Bu haqda 24 mart tarixində Bakuplus.az ATV-yə istinadən xəbər verir.
Bir sıra hallarda avtoyuma məntəqələri düz yaşayış evlərinin yaxınlığında, bəzən hətta binaların birinci mərtəbəsində açılır. Binanın 1-ci mərtəbəsində mənzil alan şəxs sonradan onun təyinatını dəyişərək avtoyuma məntəqəsi açır. Həmin obyektlərdə işlədilən su nasoslarının səsi də insanları narahat edir.
Avtoyuma məntəqələrinə köhnə bina ilə yanaşı yeni binaların zirzəmisində də rast gəlinir. Zirzəmidə belə məntəqələrin olması isə binanın üzlüyünə də mənfi təsir göstərir.
“Binaların zirzəmisində və ya yaxınlığında hər hansı bir avtomobil yuyucu sexi qurmaq qəti qadağandır. Çünki bunlar onun özünə axıb gedə bilər və istismar müddətini azalda bilər. Təzə binaların əksəriyyətinin altında qarajları olur. Bu, qarajlara ziyandır, onlara su dama bilər”, - memar Polad Əsgərov bildirib.
Bu cür qayda pozuntusuna görə fiziki şəxslər 200 manatdan 300 manatadək, vəzifəli şəxslər 2500 manatdan 3500 manatadək, hüquqi şəxslər isə 8000 manatdan 10.000 manatadək cərimə edilir.
