Havaların qeyri-sabit və şaxtalı keçdiyi günlərdə içməli su xətlərinin və sayğacların donmadan qorunmasına ciddi fikir verilməlidir. Bu haqda “Azersu” ASC-nin mətbuat xidməti məlumat verib.
Şaxtalı günlərdə fərdi yaşayış evlərində və təsərrüfat sahələrində, o cümlədən ticarət obyektlərində istehlakçılar tərəfindən quraşdırılmış sayğacların sıradan çıxmaması üçün qabaqlayıcı tədbirlərin görülməsi zəruridir.
Gecə saatlarında şaxtanın gücləndiyi vaxtlarda sayğacın giriş klapanı bağlanmalı, çıxış klapan açıq qalmalı, suyun sayğaca daxil olmasının qarşısını almaq üçün sayğac qutularının qapağı bağlanmalıdır. Donmadan qorunma tədbirləri olaraq sayğacların səthlərini isti yun örtüklərlə bükmək, və ya sayğac qutusunun içərisinə quru yonqar qoymaqla örtmək tövsiyə olunur.
Şaxtalı havalarda içməli suyun verilməsində və sayğacların işləməsində yaranan problemlərlə əlaqədar abonentlər “Azərsu” ASC-nin 24 saat xidmət göstərən 955 “qaynar xətt”inə müraciət edə bilərlər.
Milli Hidrometeorologiya Xidmətinin mətbuat xidmətinə istinadən Bakıda və Abşeron yarımadasında 15 yanvar tarixində havanın temperaturunun gecə 2 dərəcəyə qədər şaxta, gündüz isə 5-8 dərəcə isti olacağı gözlənilir.
