Suraxanı rayonu, Bülbülə qəsəbəsi, Nəriman Nərimanov küçəsindəki yollar uzun müddətdir ki, təmirsiz və baxımsız qalıb. Bu haqda AZTV bu gün, 10 may tarixində reportaj hazırlayıb.
Qəsəbədə yayda yollar toz içində, qışda isə palçıqlı olur. Sakinlər iddia edir ki, aidiyyəti qurumlar əraziyə dəfələrlə baxış keçirib. Ümumilikdə, Nəriman Nərimanov küçəsi istisna olmaqla, demək olar ki, yaxınlıqdakı küçələrin hamısı təmir olunub.
Burada yaşayan sakinlər öz hesablarına yollara beton töküblər. Lakin ərazidə kanalizasiya xətləri yenilənərkən aparılan qazıntı işlərindən sonra yollar daha da keçilməz olub.
Suraxanı RİH-in Bülbülə qəsəbəsi üzrə nümayəndəsi Elçin Seyfullayevin sözlərinə görə, adıçəilən küçə barədə Azərbaycan Avtomobil Yolları Dövlət Agentliyinə (AAYDA) məlumat verilib.
AAYDA-nın rəsmisi Anar Nəcəfli isə qeyd edib ki, qurum məsələ ilə bağlı xəbərdardır. “Həmin ərazi ilə bağlı məsələ diqqətimizdədir. Yerli icra strukturlarına bununla bağlı təqdimatlar verilib və növbəti investisiya proqramlarına salınaraq həmin ərazilərin təmiri tərəfimizdən təmin olunacaq. Ümumilikdə qeyd edim ki, Bakı şəhərinin 2500 km yaxın ərazisinin bu cür təmirə ehtiyacı var, ona görə də bu işlər mərhələli şəkildə icra olunur”, - deyə Nəcəfli bildirib.
