Bakıda yeni il adət ənənələrinin yayılması 19-cu əsrin ortalarından başlayıb. Bu haqda “belə belə işlər” video material hazırlayıb.
Həmin dövrdə Bakıda təkcə provoslavlar deyil, Milad və Yeni ili qeyd edən digər xristianlar da yaşayıb. Yeni ilin ilk həftəsində insanlar bir-birinin evlərinə gedərək hədiyyələr verib.
1880-ci illərin əvvəllərində isə insanlar bu adətin əvəzinə xeyriyyə məqsədilə ianələr verməyə başlayırlar.
O illərdə Bakıda ayrıca şam ağacı satan mağazalar olmadığından, Yeni il bəzək əşyaları aptek və şirniyyat mağazalarında satılırdı. Bu haqda hətta “Kaspi” qəzetinin 1881-ci il buraxılışında buna dair reklam da var.
Həmin dövrdə şəhər ziyalıları üçün təşkil olunan Yeni il şənlikləri və maskaradlara xanımların maska taxması, hərbçilərin hərbi formada, mulki şəxslərin isə frakda gəlməsi vacib idi.
1883-cü ilin başlanğıcı həm Bakı İctimai Məclisinin zalında, həm də orta təbəqə üçün nəzərdə tutulan və yeni tikilmiş “Monplezir” zalında qeyd edilmişdir. Elə həmin ildən etibarən Bakıda ilk dəfə maskarad geyimlərini kirayə verən mağaza fəaliyyətə başlamışdır.
1885-ci il Bakıda Yeni il gecəsi havaya atəş açanların boş giliz əvəzinə əsl güllələrdən istifadə etməsi nəticəsində evlərin pəncərələri qırılmışdır. Xəbərdarlıq və həbslərə baxmayaraq, bu ənənə növbəti illərdə də davam etmişdir.
1890-cı ildə Bakı İctimai Məclisində təşkil olunan Yeni il ziyafətinə giriş haqqı insanların öhdəsinə buraxılmış və toplanan məbləğ yoxsul əhali arasında bölüşdürülmüşdür.
Uzun illər davam edən bu ənənənin əsasını Bakı qubernatoru Vladimir Roqqe qoymuşdur.
[caption id="attachment_22891" align="alignnone" width="800"]
Açıq mənbə[/caption]
