Paytaxtın Suraxanı rayonu, Kərəm İsmayılov küçəsində olan yataqxanada 37 ailə yaşayır. Yataqxana artıq bir necə ildir qəzalı vəziyyətdədir. Belə ki, yataqxananın divar hissəsində iri çatlar əmələ gəlib, eyni zamanda tavan hissəsində çökmələr baş verib. Bu haqda bu gün, 13 yanvar tarixində Bakuplus.az ATV-yə istinadən məlumat verir.
Sakinlər deyirlər ki, yataqxana qəzalı vəziyyətdə olduğundan hər an binanın uçacağından ehtiyat edirlər. Hətta otaqların divar hissələri bir neçə dəfə çöküb.
Əraziyə cavabdeh olan 137 saylı mənzil-kommunal istismar sahəsinin mühəndisi Nazir Zeynalov bildirdi ki, bina FHN-in rəyi əsasında “qəzalı binalar” siyahısına salınıb: “FHN-in 29.01.2016 tarixində verdiyi rəyə əsasən, bina qəzalı vəziyyətdə sayılır. Ona görə o binanın təmiri müvəqqəti olaraq dayandırılıb. Binada ciddi çatlar var, onunla bağlı biz aidiyyəti orqanlara, baş idarəyə müraciət eləmişik”.
Nazir Zeynalov, həmçinin bildirdi ki, aidiyyəti qurumların qərarından sonra yataqxanada yaşayan sakinlərin köçürülməsinə başlanacaq. Qeyd edək ki, ikimərtəbəli 37 mənzilli bina 1950-ci ildə inşa olunub, Dövlət Neft şirkətinin yataqxanası olub. Sonradan Mənzil-Kommunal İstismar Sahəsinin balansına verilib.
