Bakıda Azərbaycanın Vətən müharibəsindəki tarixi Qələbəsinin ildönümünə həsr edilmiş təqdimat - sərginin açılışı olub. Tədbir Mərkəzi Elmi Kitabxanada AMEA-nın Humanitar və İctimai Elmlər Bölməsinin təşkilatçılığı ilə baş tutub. Bu haqda AZƏRTAC 2 noyabr tarixində xəbər verib.
“Akademiyanın Qarabağnamələri” mövzusunda təşkil edilən sərgidə Qarabağın dair, eləcə də böyük Qələbəmizə həsr edilmiş kitablar və rəsm əsərləri nümayiş olunub.
Tədbirdə AMEA-nın vitse-prezidenti akademik İsa Həbibbəyli, Memarlıq və İncəsənət İnstitutunun baş direktoru Ərtegin Salamzadə, AMEA-nın müxbir üzvü Könül Bünyadzadə, Tarix İnstitutunun əməkdaşı, Cəmaləddin İsmayılov və şəhid anası Simuzər Bağıyeva da çıxış ediblər.
Noyabrın 8-dək davam edəcək sərgidə bölmənin elmi müəssisələrinin alimləri tərəfindən ərsəyə gəlmiş 38 monoqrafik tədqiqat və 6 institutun 16 əməkdaşının çəkdiyi rəsm əsərləri təqdim olunur.
Tədbirin bədii hissəsində filologiya elmləri doktoru Vüqar Əhməd, filologiya üzrə fəlsəfə doktoru Qiymət Məhərrəmli, şair İbrahim Yusifoğlu, Lalə Əliyeva və Ruşan Ruşanzadə Qarabağa və Qələbəmizə həsr edilmiş şeirlərini səsləndiriblər.
Daha sonra saz sənətkarı Nəsib Nüsrətoğlunun ifasında qəhrəmanlıq rəmzi olan “Misri” havası dinlənilib.
