Bakıda standartlara uyğun olmayan Çin istehsalı saxta şprislər satılır. Bu haqda 14 may tarixində Bakuplus.az ATV-yə istinadən xəbər verir.
Həmin fakt “Azad İstehlakçılar” İctimai Birliyi tərəfindən apteklərdə aparılan monitorinq zamanı üzə çıxıb. Məlum olub ki, 2019-cu ildə istehsal olunan və standartlara uyğun olmayan, istifadəyə yararsız şprislər bu gün də bəzi apteklərdə satılır.
“İstehlakçıların gətirdiyi şprislər arasında elələri var ki, onun hətta iynəsinin ucunda pas var. Şprislər arasında eləsi də var ki, barmaqla toxunursan, üstündəki şkala silinir, halbuki hər bir şkalanın dərmanın miqdarını müəyyən etmək üçün böyük əhəmiyyəti var. Həmçinin bu şprislərin porşeni standartlara uyğun deyil. Bu porşen vasitəsilə dərmanı çəkəndə, onun bir dayandırıcısı yoxdur”, - birliyin sədri Eyyub Hüseynov bildirib.
Ekspertin fikrincə, onların yenidən qablaşdırılaraq satışa çıxarılması da istisna edilmir. Standartlara uyğun şprisi isə yalnız bir dəfə istifadə etmək mümkündür.
Səhiyyə Nazirliyinin Analitik Ekspertiza Mərkəzində belə bir halın baş verməsini təkzib ediblər.
“Şpris respublikaya idxal olunarkən ilk öncə onun sənədləri yoxlanılır, ekspertizası aparılır, ondan sonra şpris laboratoriyaya göndərilir. Laboratoriyada İSO-7886-1 standartının tələblərinə uyğun olaraq şprislərin nominal həcmi, ümumi həcmi, ölü sahənin təyini və sterilliyi yoxlanılır. Yoxlanılan parametrlərdə hər hansı uyğunsuzluq mövcud olmazsa, şprislər satışa buraxılır. Apteklərdə hər hansı bir arzuolunmaz hal ilə rastlaşdıqda, əhalidən həmin şpris nümunəsi ilə birlikdə mərkəzə müraciət etmələri xahiş olunur”, - mərkəzin laboratoriya müdiri Çingiz Şükürov deyib.
