Bakıda "COVID-19: Erkən və Gecikmiş Fəsadlar" mövzusunda beynəlxalq elmi konfrans keçirilir. Bu haqda 20 noyabr tarixində Report xəbər verib.
Konfrans Dövlət Gömrük Komitəsi Tibbi Xidmət İdarəsi Elmi-Təcrübi və Tədris Mərkəzi, Mərkəzi Gömrük Hospitalı və Mərkəzi Gömrük Hospitalının rəsmi tərəfdaşı "Florence Nightingale" Xəstəxanalar Qrupunun birgə təşkilatçılığı ilə baş tutub.
Tədbir Azərbaycan Dövlət Himninin səsləndirilməsi ilə öz işinə başlayıb.
“18-24 noyabr Ümumdünya Antibiotiklərlə Bağlı Maarifləndirmə Həftəsi”nə həsr edilmiş konfransda 150 nəfərin əyani, 500-dən çox mütəxəssis isə onlayn iştirak edib.
Dövlət Gömrük Komitəsi Tibbi Xidmət İdarəsinin rəisi, tibb xidməti general-mayoru Ceyhun Məmmədov pandemiya ilə mübarizə üçün ölkədə 46 dövlət xəstəxanası ayrıldığını qeyd edərək konfransın işini açıq elan edib.
