“Azəriqaz” İstehsalat Birliyi yaxın 5 il ərzində Bakıda yeni dairəvi qaz şəbəkəsinin tikintisini başa çatdıracaq. Bu haqda bu gün, 11 may tarixində Report “Azəriqaz”ın baş direktoru Ruslan Əliyevə istinadən məlumat verib.
Hazırda qaz kəmərlərinin müasirləşdirilməsi və yeni dairəvi şəbəkənin qurulması istiqamətində işlər aparılır. Bu günə kimi Bakı şəhərində qaz kəmərlərinin cəmi 10%-i yeni dairəvi sistemə qoşulub ki, bu da qaz təchizatında və təmir işlərində problemlər yaradır.
“Azəriqaz”ın rəhbəri qeyd edib ki, qəza və ya təmir işləri baş verərsə, çoxlu sayda abonentin qaz təchizatını dayandırmaq lazımdır.
“Amma dairəvi sistem olsa, biz həmin qəza yerini lokallaşdıra bilərik və hər hansı hadisə zamanı maksimum 500-1000 abonent qazsız qala bilər. Ancaq hazırda baş verən qəza hallarında 60-70 min abonent qazsız qalır. Bu da bizim ümumi iş fəaliyyətimizə təsir göstərir”, - deyə Ruslan Əliyev bildirib.
O, həmçinin əlavə edib ki, paytaxtda halqa sisteminin tikintisinin yaxın 5 ildə başa çatdırılması planlaşdırılır.
