Bakıda xor ifaçılığı üzrə ustad dərsi və konsert keçiriləcək. Bu haqda BakuPlus.az 11 fevral tarixində xəbər verir.
15 fevral tarixində Azərbaycan Rəngkarlığı Muzeyində baş tutacaq master-klasda təlimçi qismində ölkəmizdən kənarda yaşayıb-yaradan görkəmli incəsənət xadimi Elnarə Kərimova çıxış edəcək.
Ustad dərsində iştirak etmək üçün qeydiyyatdan keçmək mütləqdir. Giriş sərbəstdir.
17 fevralda isə Azərbaycan Dövlət Akademik Filarmoniyasında "Mədəni yenilənmə" layihəsi çərçivəsində Azərbaycanın Xalq artisti, Ankara Radiosu Çoxsəsli Xorunun bədii rəhbəri və dirijoru Elnarə Kərimovanın səhnə fəaliyyətinin 30 illik yubileyinə həsr olunmuş konsert proqramı təqdim olunacaq. Konsertdə məşhur bəstəkarların xor əsərləri səsləndiriləcəkdir.
2012-ci ilin mart ayında "Zirvə" mükafatına layiq görülmüş Elnarə Kərimova Türkiyənin bir çox şəhərindəki festival və tədbirlərdə 300-dən artıq konsert vermişdir.
Konsertə biletləri Filarmoniyanın kassasından əldə etmək mümkündür.
