Bakıda məktəblilər arasında “Mənim gündəliyim” oxu və yaradıcılıq müsabiqəsi keçirilir. Bu haqda Azərtac bu gün, 5 mart tarixində xəbər verib.
Bakı Şəhəri üzrə Təhsil İdarəsi (BŞTİ) tərəfindən keçirilən müsabiqənin əsas məqsədi təhsil alanların mütaliə vərdişlərinin təkmilləşdirilməsi, oxu və yazı bacarıqlarının inkişaf etdirilməsidir.
İki mərhələdən (məktəb və şəhər) ibarət müsabiqədə Bakı şəhəri ümumi təhsil müəssisələrinin 1-7-ci sinif və 8-11-ci siniflər üzrə şagirdləri iştirak edəcəklər.
Birinci mərhələdə şagirdlər Azərbaycan və dünya ədəbiyyatından əsərləri oxuyaraq gündəlik hazırlayacaqlar.
Şəhər mərhələsində isə şagirdlərin təqdim etdikləri gündəliklərə münsiflər heyəti tərəfindən baxış keçiriləcək, qiymətləndirmə meyarlarına uyğun olaraq ən yaxşı işlər seçiləcək.
5 nəfər birinci, 5 nəfər ikinci, 5 nəfər üçüncü yer olmaqla, ümumilikdə 15 şagird qalib adını qazanacaq.
Xüsusi fəallığı ilə fərqlənən 10 şagirdə tərifnamə, fəal iştiraka görə 25 şagirdə isə təşəkkürnamə təqdim ediləcək.
