Bakıda Novruz bayramı münasibətilə auksion təşkil olunacaq. Bu haqda BakuPlus.az bu gün, 17 mart tarixində xəbər verir.
Azərbaycan Respublikası Mədəniyyət Nazirliyi, Azərbaycan Dövlət Rəsm Qalereyası və “Auction Baku” MMC-nin təşkilatçılığı ilə baş tutacaq hərrac Azərbaycanda auksion ənənələrinin inkişaf etdirilməsi, bu sahədə rəqabət qabiliyyətliliyini gücləndirmək, ölkənin iqtisadi inkişafında yaradıcı sənayenin rolunu artırmaq məqsədilə həyata keçiriləcək.
3 aprel, saat 18:00-da keçiriləcək auksionda rəsm əsərlərinin sərgilənməsi ilə yanaşı, 5 tanınmış rəssamın - Vüqar Muradov, Mir Azər Abdullayev, Anar Hüseynzadə, Cəlal Ağayev və Milena Nəbiyevanın Novruz bayramı atributlarından olan yumurta forması üzərində çəkdiyi əsərlər hərraca çıxarılacaq.
Hərracın Nazirlər Kabineti yanında Operativ Qərargahın COVİD-19 pandemiyası ilə əlaqədar qəbul etdiyi karantin qaydalarına uyğun keçirilməsi nəzərdə tutulur.
