Bakının Binəqədi rayonunda yerləşən Azərbaycan Uşaqlar Birliyinin sığınacağından uşağını götürmək istəyərək polisə müqavimət göstərən qadın cəzalandırılıb. Bu haqda bu gün, 10 yanvar tarixində Baku.ws məlumat verib.
Sığınacaqda polis əməkdaşlarına hücum edən və Post Patrul Xidməti avtomobilinin şüşəsini sındıran A.Kazımova barədə məhkəmə prosesi başa çatıb.
Məhkəmənin qərarı ilə A.Kazımovanın himayəsində azyaşlı olduğu üçün ona cərimə cəzası verilib. Həmçinin bölmədə xidməti avtomobilə dəyən zərər ödətdirilib.
Yanvarın 4-ü A.Kazımova və uşağın nənəsi Azərbaycan Uşaqlar Birliyinin sığınacağına gələrək övladını götürmək istəyiblər. Lakin iş günü olmadığı üçün bu alınmayıb və nəticədə mübahisə yaranıb. Polislər qadınlarla 1 saat söhbət aparmaqlarına baxmayaraq, sonuncular polis əməkdaşlarına və polis avtomobilinə hücum ediblər, avtomobilin süşələrini qırıblar və polis əməkdaşlarına fiziki xəsarətlər yetiriblər. Hər iki şəxs Binəqədi rayon 4 saylı Polis Bölməsinə aparılıb.
