Xətai rayonu, Zığ qəsəbəsində binalardan birində təhlükəli vəziyyət yaranıb. Polad Həşimov 7 küçəsində yerləşən dördmərtəbəli binanın eyvanlarının məhəccəri sökülüb və yenisi ilə əvəz olunmur. Bu haqda Milli.az reportaj paylaşıb.
Sakinlərin sözlərinə görə, onlar 6 aya yaxındır ki, bu vəziyyətdə yaşayırlar. İşlər rayon icra hakimiyyətinin əməkdaşları tərəfindən aparılır. Əlavə olaraq sakinlər qeyd ediblər ki, qurum tərəfindən onlara, söküntüdən sonra 3 gün ərzində binada yeni və müasir eyvanların tikiləcəyi və fasadların yenilənəcəyi bildirilib.
Yağışlı havada eyvana çıxmaq daha da təhlükəli olur. Uşaqları və özlərini hündürlükdən yıxılmaqdan qorumaq üçün evin sakinləri qapını açarla bağlamağa, eyvana çıxmamağa məcbur olurlar.
Xətai rayon İcra Hakimiyyətinin nümayəndəsinin sözlərinə görə, hazırda həmin ərazidə əsaslı təmir işləri aparılır. Təmir bitmədiyi üçün balkonlar hələ də tikilməyib. Yaxın vaxtlarda binanın eyvanları və fasadı bərpa edilərək sakinlərin istifadəsinə veriləcək.
