Bakıda 178 məktəbdə STEAM layihəsi tətbiq edilir. Bu haqda 27 dekabr tarixində Trend məlumat verib.
STEAM tətbiq olunan məktəblərdə “3D çap”, “Microbitlə proqramlaşdırma”, “Elektrik mühəndisliyi”, “Biotexnologiya”, “Nanotexnologiya”, “Robototexnika”, “Gen mühəndisliyi”, “CNC lazer kəsiciləri”, “Pilotsuz uçuş aparatları (tədris dronları)” üçün hazırlanmış kurikulum üzrə dərslər təşkil olunur.
Bu məktəblərdə işləyən 658 müəllim STEAM təlimlərindən keçərək sertifikat əldə edib. Layihəyə qoşulan məktəblər arasında "Online Hackathon 2021", "Online VEX Robotics" və "Makerthon 2021" yarışları keçirilib.
2021-2022-ci tədris ilindən etibarən Respublika üzrə STEAM layihəsinin əhatə edəcəyi şagird sayının 302 ümumtəhsil məktəbindən 50.000–100.000 aralığında olması nəzərdə tutulur. Əhatə dairəsinin genişləndirilməsi çərçivəsində ölkə üzrə 15 STEAM Mərkəzinin yaradılması planlaşdırılıb.
