Bakı Şəhər Dövlət Yol Polisi İdarəsi (BŞDYPİ) və Təhsil Nazirliyinin 1 saylı Uşaq Gənclər Mərkəzinin birgə layihəsi çərçivəsində “Uşaqlar yol hərəkəti qaydalarını necə öyrənib?” mövzusunda 28 fevral tarixində tədbir baş tutub. Bu haqda bu gün, 1 mart tarixində Bakuplus.az təhsil müəssisəsinin Facebook səhifəsinə istinadən məlumat verir.
Tədbir “Yol hərəkətinin təhlükəsizliyinə dair 2019-2023-cü illər üçün Dövlət Proqramı”na uyğun olaraq keçirilib.
Yarışın keçirilməsində məqsəd uşaqların yol hərəkəti qaydaları haqqında biliklərini yoxlamaq və istedadlı uşaqları üzə çıxarmaqdır.
Yarışda 1 saylı Uşaq-Gənclər İnkişaf Mərkəzinin əməkdaşları, valideynlər, 34, 45, 244 və 266 nömrəli tam orta məktəblərdə fəaliyyət göstərən “Yol Hərəkəti Qaydaları” dərnəyinin üzvləri iştirak ediblər.
25 şagirdin iştirak etdiyi müsabiqədə uşaqlar yol hərəkəti qaydaları ilə bağlı biliklərini yazılı şəkildə cavablandırıb və münsiflər heyəti ilk 3 yerin qaliblərini müəyyən edib. Bütün tələbələr fəal iştiraklarına görə diplom və təşəkkürnamələrlə təltif olunublar.
