Bakıda Dövlət Turizm Agentliyi (DTA) ilə Türk Əməkdaşlıq və Koordinasiya Agentliyinin (TİKA) əməkdaşlığı çərçivəsində yeni layihənin təqdimatı olub. Bu haqda Azərtac bu gün, 21 fevral tarixində xəbər verib.
Azərbaycanın müxtəlif regionlardan seçilən turizm işçiləri Türkiyənin Antalya şəhərində təşkil olunacaq turizm üzrə təlim proqramına qatılacaqlar.
Tədbirdə Türkiyənin Azərbaycandakı səfiri Cahit Bağçı, Dövlət Turizm Agentliyinin Aparat rəhbəri Kənan Qasımov və digərləri iştirak ediblər.
Layihə iki mərhələdən ibarət olmaqla “Turizm təlimində müasir yanaşmalar” nəzəri proqramı ilə ilk olaraq fevralın 21-dən 25-dək Bakıda, daha sonra isə “Hotel və səyahət xidmətləri sahəsi – yemək və içki sahəsində təlimçilər üçün təlim” praktiki proqramı ilə martın 14-dən 25-dək Antalyada keçiriləcək.
İlk mərhələyə qatılan 35 iştirakçı arasından təlimi uğurla başa vuran 14 nəfər layihənin ikinci mərhələsi üçün seçilərək Türkiyə Milli Təhsil Nazirliyinin Antalya Falez Peşə və Texniki Anadolu liseyi tərəfindən təşkil olunacaq ikinci praktiki mərhələyə cəlb olunacaq.
[caption id="attachment_34380" align="alignnone" width="800"] Foto Azərtac.az saytından[/caption]
