Bakıda yerüstündə parklanma problem olsa da, yeraltı dayanacaqlar boş qalır. Bu haqda bu gün, 16 fevral tarixində Bakuplus.az ATV-yə istinadən xəbər verir.
Hökümət evi və Qış parkının altı, eləcə də iri ticarət mərkəzlərinin yeraltı dayanacaqları çox vaxtı boş qalır. Sürücülər gün boyu avtomobillərini bu yerlərdə saxlamaqdan imtina edirlər.
Səbəbini soruşduqda isə qiymətlərin əlçatan olmamasını bildirirlər. Bəzi dayanacaqlar 8-10 saata görə 10-15 manat qiymət qoyurlar.
“10 manat günü çoxdur axı, şəxsən mənim özümə sərf edən deyil. Məcbur olub qadağan olunan yerlərdə saxlayırıq. Cərimədə yazmaq istəyəndə götürüb saxlayırıq başqa yerdə,”- deyə sürücülərdən biri qeyd edib.
Məsələ ilə bağlı BNA-dan bildirildi ki, yalnız iki yeraltı avtomobil dayanacağı agentliyin balansındadır. Digərləri özəl şirkətlər tərəfindən istifadə edilir və qiymətləri də elə özləri təyin edirlər. Agentliyin balansında olan dayanacaqlarda qiymətlər isə özəl dayanacaqlardan təxminən iki dəfə ucuzdur. Bu dayanacaqlarda bir sıra əlavə güzəştlərdə nəzərdə tutulur. Məsələn, yaxınlıqda yaşayan və ya işləyən şəxslər avtomobillərini daha az ödəniş etməklə burada saxlaya bilər.
