Paytaxtın bəzi ərazilərində zibil qutularının yerləşdirilməsi üçün ayrılan yer sakinlərə maneçilik törədir. Bu haqda Xəzər Xəbər bu gün,1 fevral tarixində reportaj hazırlayıb.
Xətai rayonu Məhəmməd Hadi küçəsində, “Əhmədli” metro stansiyasının yaxınlığında qoyulan zibil konteynerləri düz avtobus zolağının üstündədir. Bu da həm nəqliyyat hərəkətinə mane olur, həm də ora zibil atmağa gələn sakinlərin həyatını təhlükəyə salır. Sakinlərin sözlərinə görə, zibil atmağa gedənlər bir neçə dəfə orada qəzaya düşüblər.
Tullantı konteynerlərinin yerinin düzgün seçilmədiyi ərazilərdən biri də Xətai rayonundakı 64 nömrəli məktəbin ətrafıdır. Zibil qabları məktəbin hasarına düzülüb. Ərazidə yaşayan sakinlərin sözlərinə görə, xüsusən günün müəyyən saatlarında zibil qablara daha çox tökülür. Bu isə daha çox antisanitariyanın yaranmasına səbəb olur.
Suraxanı rayon Mənzil Kommunal Təsərrüfatı Birliyinin sədri Mais Məmmədov bildirib ki, zibil konteyneri üçün yer seçilərkən bir neçə amil nəzərə alınıb. Onun sözlərinə görə, kommunal xidmətlər məhəllələrdə zibil qutularının quraşdırılması üzərində işləyir. Ancaq bəzi məhəllələrdə bu mümkün deyil. Belə ki, zibil qutularından istifadə və onların daşınmasında böyük problem yaranıb. Ona görə də zibil qutuları yol kənarlarında quraşdırılır. Sədrin dediklərinə görə, istisna hallarda dəyərləndirmələr aparıldıqdan sonra zibil qutularının yeri dəyişdirilə bilər. Bunun üçün ümumi razılıq olmalıdır ki, ərazidə yaşayan sakinlər tullantıları rahat şəkildə ata bilsinlər.
