Bakının bəzi magistral yollarında işıqlandırma sistemi ilə bağlı müxtəlif problemlər müşahidə olunur. İşıq dirəklərinin olmaması gecə saatlarında yolların qaranlıq olmasına səbəb olur, və qəzaların sayını artırır. Bu haqda AzTV Xəbər reportaj hazırlayıb.
Belə ki, Bakı Beynəlxalq Avtovağzal kompleksindən üzü şəhər istiqamətində hərəkət edərkən paytaxtın giriş hissəsinə yaxın yolun sağ tərəfində yarımçıq quraşdırılan dirəklərə və yaxud onların yerində olan açıq naqillərə rast gəlmək olur. Həmin ərazidə işıq olmadığına görə sürücülər sürəti azaldırlar. Lakin onların sözlərinə görə, bəzi hallarda hətta bu da qəzaların qarşısını almağa kömək etmir.
Azərbaycan Avtomobil Yolları Dövlət Agentliyinin rəsmisi Anar Nəcəfli bildirib ki, Bakı dairəvi avtomobil yolunda olan problemlə bağlı agentliyin müvafiq şöbəsinə tapşırıq verilib ki, qısa müddət ərzində həmin əraziyə baxış keçirilsin, və aidiyyəti üzrə həmin problemin aradan qaldırılması üçün lazımi addımlar atılsın.
Oxşar olayla paytaxtın giriş hissəsində, Mərkəzi Badamdar yolu adlanan ərazidə rastlaşmaq olar. Həmin ərazinin bəzi hissələrində işıq dirəklərinin olmaması gecə saatlarında sürücülər üçün qəzalı vəziyyət yaradır. Elektrik naqillərinin açıq vəziyyətdə qalması da təhlükədən xəbər verir.
Bakı Şəhər İcra Hakimiyyətindən bildirildi ki, ərazidə monitorinq aparılıb. Yaxın gələcəkdə yolun həmin hissəsində müvafiq tədbirlər görüləcək.
