ARB TV Bakının ən təhlükəli prospektləri ilə bağlı reportaj hazırlayıb. Jurnalistlər piyada ölümlərinin sayına görə ilk üçlükdə hansı prospektlərin olduğunu müəyyən ediblər.
Qəzaların böyük əksəriyyəti paytaxtın əsas prospektlərində qeydə alınıb. Belə ki, 6.5 kilometr olan 8 noyabr prospektində sağ və sol tərəflərində yaşayış məntəqələrin olmasına baxmayaraq, cəmi 3 piyada keçidi var.
BDYPİ-nin baş inspektoru Araz Əsgərlinin sözlərinə görə, ərazidə piyadalar üçün nəzərdə tutulan infrastrukturda ciddi çatışmamazlıq var. Həmçinin prospektin bəzi yerlərində işıqlandırma sistemi işləmir. Bu amillər birləşərək onu piyadalar üçün ən təhlükəli prospektlərdən birinə çevirir. Piyada vurma hallarının ən çox qeydə alındığı paytaxt yolları içərisində 3-cü yerdə dayanıb.
Piyadalar üçün ikinci təhlükəli yer isə Ziya Bünyadov prospekti tutur. 10 hərəkət zolağından və 2 hərəkət hissəsindən ibarət olan Ziya Bünyadov prospektində demək olar ki, hər gün piyada vurma halları qeydə alınır.
Yol eksperti, Elməddin Muradlı hesab edir ki, Ziya Bünyadov prospektində çox piyada vurma hallarına səbəb orada böyük ticarət mərkəzlərinin yerləşdirilməsidir. Bundan əlavə, piyada keçidlərinin arasında məsafə uyğun deyil, və hərəkət intensivliyi yüksəkdir.
Piyada vurma hallarının ən çox qeydə alındığı yollar siyahısında ilk pillədə ümumi 12 hərəkət zollağından ibarət Heydər Əliyev prospekti qərarlaşıb. Burada piyada keçidlər çox olsa da, piyada vurma hallarının yaşanmasına səbəb insan məsuliyyətsizliyidir.
Araz Əsgərli qeyd edib ki, piyadalar yeraltı keçidlərdən düzgün istifadə etmir. Hətta günün qaranlıq saatlarında məsafəsinin yaxınlaşdırdığını zənn edərək özünü təhlükəyə atır.
Bu il, 9 ay ərzində paytaxtda 483 piyada vurma hadisəsi baş verib. Qəzalar zamanı ölüm halları ilə də tez-tez rastlaşmaq olar. Ümumilikdə, həmin qəzalar zamanı 230 piyada həyatını itirib.
