"BakuBus" şirkətinin 13 saylı sərnişin avtobusunun sürücüsü ağlayan körpəni sakitləşdirmək üçün qucağına alıb. Bu haqda bu gün, 4 fevral tarixində Oxu.az məlumat verib.
Sosial şəbəkələrdə yayılan videoda deyilir ki, körpənin anası çalışsa da, onu sakitləşdirə bilməyib. Uşağı qucağına alan sürücü onun köməyinə gəlib.
Bakı Nəqliyyat Agentliyinin (BNA) mətbuat katibi Mais Ağayev bildirib ki, görüntülər fevralın 2-də avtobus dayanacaqda olarkən lentə alınıb. Sürücü Oqtay Novruzov körpənin dayanmadan ağladığını görüb və valideynlərinin icazəsi ilə onu sakitləşdirmək üçün qucaqlayıb. Tıxacın olduğunu nəzərə alan sürücü körpəni sakitləşdirib və valideynlərinə qaytarıb. İdarənin mətbuat katibi onu da qeyd edib ki, sürücünün 6 uşağı var.
Daha öncə sürücü Oqtay Novruzov bir dəfə də peşəkar yanaşması ilə seçilib: 2017-ci ildə o, epilepsiya xəstəsi olan sərnişinə ilkin tibbi yardım göstərməklə həyatını xilas edib.
