Bakı Dövlət Universitetinin professoru “Rozetli Qızıl Şəfəqli Gündoğar Ordeni”nə layiq görülüb. Bu haqda Azərtac xəbər verib.
Yaponiyanın Azərbaycandakı səfirinin iqamətgahında “Rozetli Qızıl Şəfəqli Gündoğar Ordeni”nin təqdim olunması mərasimi keçirilib.
Mərasimdə Yaponiyanın Azərbaycandakı səfiri Cuniçi Vada bildirib ki, Bakı Dövlət Universitetinin Şərqşünaslıq fakültəsinin Uzaq Şərq dilləri və ədəbiyyatı kafedrasının müdiri, professor Oqtay Cəlilbəyli Azərbaycanda yapon dili və mədəniyyətinin davamlı təbliğinə və ölkələrimiz arasında dostluq əlaqələrinin inkişafına verdiyi töhfələrə görə bu ordenə layiq görülüb.
Tədbirdə Oqtay Cəlilbəyli fəaliyyətinə verilən yüksək qiymətə görə minnətdarlığını ifadə edib, ölkələrimiz arasında dostluq əlaqələrinin inkişaf tarixindən danışıb.
Sonda xatirə şəkilləri çəkilib.
