Binəqədi qəsəbəsi, 2-ci mədən sakinləri yol infrastrukturundan narazıdırlar. Bu haqda 22 fevral tarixində Realtv məlumat verib.
Ağdamlılar məhəlləsi kimi tanınan ərazinin sakinləri bildirirlər ki, məhəllədaxili yollarda bir neçə dəfə bərpa işləri aparılsa da, asfalt örtüyü tez bir zamanda dağılaraq sıradan çıxıb. Buna səbəb isə sakinlər tərəfindən çəkilən kanalizasiya xəttində yaranan daşmalardı. Ətrafa dolan kanalizasiya və yağış suları örtüyün sökülərək yararsız hala düşməsinə şərait yaradır. Digər tərəfdən, ötən il əraziyə çəkilən su xətti də asfalt örtüyündə kələ-kötürlüyün daha çox artmasına səbəb olub.
“Məlumat üçün bildiririk ki, sözügedən ünvanda kanalizasiya sistemi mövcud deyil. Mərkəzləşdirilmiş qaydada kanalizasiya şəbəkəsinin qurulması dövlət proqramlar çərçivəsində “Azərsu” ASC tərəfindən həyata keçirilir. Həmin ünvanda asfalt örtüyü ilə bağlı bildirmək istəyirik ki, rayon ərazisində yenidənqurmaya ehtiyacı olan qəsəbədaxili yolların mərhələli qaydada təmiri ilə bağlı RİH tərəfindən siyahı tərtib edilərək AAYDA-ya təqdim edilmişdir”, - məsələ ilə bağlı Binəqədi RİH cavab verib.
“Məlumat üçün bildirim ki, investisiya proqramına uyğun olaraq ötən il Binəqədi rayonu üzrə Binəqədi qəsəbəsi 2-ci mədən korpus 87, 88, 89, 100, 101, o cümlədən 3-cü mədən korpus 124-də təmir işləri icra olunub. Bu gündə Binəqədi rayonu üzrə 1-ci mədən korpus 2, 24, 37, 47 üzrə, həmçinin 2-ci mədən korpus 77 üzrə təmir işlərinin icrasının davam etdirilməsi nəzərdə tutulub. Növbəti investisiya proqramları üzrə bu çərçivədə sözügedən ərazilərdə təmir işləri tərəfimizdən icra olunacaq”, - AAYDA-nın əməkdaşı Anar Nəcəfli deyib.
