Binəqədidə su və kanalizasiya xəttinin olmaması sakinlərin narazılığına səbəb olur. Bu haqda 24 mart tarixində Bakuplus.az Aztv-yə istinadən xəbər verir.
Binəqəd kəndi, Mikayıl Ələkbərov küçəsinin sakinləri ərazidə kanalizasiya borularının olmamasından narahatdırlar. Burada sakinlər özləri ana xəttindən su çəkiblər və sayğacların olmaması səbəbindən su pulunu ailə üzvlərinin sayı üzrə ödəmək məcburiyyətindədirlər.
Faktla bağlı Azərsu ASC bildirir ki, həmin ünvanda su təchizat sisteminin mərkəzləşdirilmiş qaydada qurulması ilə bağlı layihə təklifləri hazırlanıb.
“Bütün küçə boyunca köhnə xətlər yeniləri ilə əvəz olunacaq. İndiyə qədər fərdi qaydada çəkilmiş primitiv xətlər ləğv olunacaq, hamısı mərkəzləşdirilmiş içməli su ilə təmin olunacaq və hər bir abonent sayğacla təmin olunacaq. Ərazidə kanalizasiya layihəsi də nəzərdə tutulub. Bunun üçün əsas daşıyıcı kanalizasiya kollektoru artıq çəkilib. Gələcəkdə bütün evlərin bu xətlə birləşdirilməsi planlaşdırılır. İşlər mərhələli şəkildə həyata keçirilir”, - Azərsu ASC-nin mətbuat xidmətinin rəhbəri Anar Cəbrayıllı bildirib.
