8 noyabr Azərbaycanın İkinci Qarabağ müharibəsində qələbəsi şərəfinə Zəfər Günü kimi qeyd olunur. Bir il əvvəl bu gün Azərbaycan ordusu Şuşa şəhərini erməni işğalından azad etmiş və bununla tarixdə ən ağır hərbi əməliyyatlardan birini həyata keçirmişdir.
10 noyabr 2020-ci ildə Azərbaycan, Ermənistan və Rusiya liderləri üçtərəfli bəyanat imzaladılar. Beləliklə, 44 günlük müharibə Azərbaycanın qələbəsi, ərazi bütövlüyünün bərpası, Ermənistanın kapitulyasiyası ilə nəticələndi.
Prezident İlham Əliyev Zəfər Gününün təsis edilməsi haqqında ilk fərmanı 2 dekabr 2020-ci ildə vermişdir. Bu sərəncama əsasən, Zəfər Günü hər il noyabrın 10-da keçirilməli idi. Lakin sonradan 10 noyabr tarixinin Türkiyədə Mustafa Kamal Atatürkün anım günü olduğunu nəzərə alaraq, ölkə başçısı 3 dekabr 2020-ci ildə Zəfər Gününün qeyd edilmə tarixini 8 noyabr tarixinə dəyişdirdi.
Təsadüfi deyil ki, məhz Şuşanın 28 ildən sonra işğaldan azad olunması günü Zəfər Günü olaraq seçildi, çünki ermənilərin özlərinində dediyi kimi Şuşaya hakim olmaq bütün Qarabağa hakim olmaq deməkdir. Bütün starteji döyüş və nəqliyyat nöqtələri Azərbaycanın nəzarətinə keçmiş və bu düşməni kapitulyasiya sənədini imzalamağa möhtac etmişdir.
Azərbaycan Respublikası Müdafiə Nazirliyinin məlumatına əsasən, Vətən Müharibəsi zamanı 2908 nəfər hərbi qulluqçu şəhid olmuş, 6 nəfər itkin düşmüşdür. Səfərbərlik və Hərbi Xidmətə Çağırış üzrə Dövlət Xidmətinin məlumatına əsasən, Bakı şəhərindən 328 nəfər hərbi qulluqçu şəhidlik zirvəsinə ucalmışdır.
