Çərşənbələrin ikincisi - Od çərşənbə, xalq arasında “Üskü çərşənbə”, “Adlı çərşənbə” kimi də tanınır.
Od çərşənbəsi qədim insanların Günəşə, oda olan inamı ilə bağlıdır. Od, tonqal, günəş istilik mənasını daşıyır və yaz fəslinin başlanmasının əsas göstəricilərindən biridir.
Həmin gün odun, tonqalın yandırılması gələcək ilin isti, bərəkətli keçməsinə işarə sayılır. El arasında yayılan adət-ənənəyə görə, od çərşənbəsində tonqal qalayıb, üç dəfə “Ağırlığım, azarım-bezarım odda yansın” deyərək, odun üstündən tullanmaqla insanlar xəstəliklərdən, pisliklərdən xilas olunur.
Digər üç çərşənbədə olduğu kimi, od çərşənbəsində də yeməklər, şirniyyatlar hazırlanır, ocağın üstü boş qalmır.
