Yel çərşənbəsi ilaxır çərşənbələrin üçüncüsüdür. Xalq arasında “Külək oyadan çərşənbə”, “Küləkli çərşənbə” kimi də tanınır.
Yel çərşənbəsi təbiətin oyanması üçün vacib olan havanın istiləşməsi ilə bağlıdır. İnama görə, bu çərşənbədə oyanan yel suyu və odu hərəkətə gətirir.
Yel çərşənbəsində qadınlar axır çərşənbə üçün hazırlıqlar görürlər. Ev əşyaları təmizlənir,
xalça-palaz çırpılır, evdəki yorğan-döşəklər havaya verilir. Həmin gün böyümüş səməninin ortasına qırmızı lent bağlanır. Yel çərşənbəsi günü tonqallar qalanır. Süfrəyə daha çox quru meyvə və dənli bitkilərdən hazırlanmış çərəzlər düzülür.
