Ötən həftə Bakıda 9 saylı məktəbin şagirdinə əl qaldıran məktəb direktorunun hərəkəti böyük rezonans doğurub. İTV onun bu addımı atmasına nəyin səbəb olduğunu anlamaq üçün 40 ildən artıq pedaqoji və 15 illik təcrübəyə malik məktəb direktoru Zinyət Əhmədovadan müsahibə alıb.
“Sosial şəbəkələrdə yayılan bu görüntü məsələin mahiyyətini tamamilə açmır. Bu əslində təhlükənin qarşısını almaq üçün, bir ananın həyacanı doğan tənbehdir. Dərsdən qaçmaq üçün pəncərəyə qalxan, özünü tullamaq həddinə çatan bir şagirdi görən zaman özümü məktəb direktoru yox, təlaşlı ana kimi apararaq bu məsələyə reaksiya verdim. Bəlkə də, soyuq başına, bu məsələni bu gün təhlil etsəydim, bunun daha effektiv daha optimal yolu ilə həll edərdim”, - Zinyət Əhmədova bildirib.
Psixoloq Fərqanə Mehmanqızının fikrincə, cəmiyyət məktəbdəki problemlərə çox az diqqət yetirir. Problem direktorda və ya valideyndə ola bilər, ancaq uşaqda deyil. Çünki uşaq ailə mühitində böyüyür.
“Valideynlər və Müəllimlər Assosiasiyasının” icraçı direktoru Şahin Rəcəbov hesab edir ki, məktəblə valideynlər arasında müqavilə bağlanmalıdır. Bu halda uşağın, valideynlərin və müəllimlərin davranış qaydaları ciddi şəkildə müəyyən ediləcəkdir. Qaydaların pozulması cərimə ilə cəzalandırılacaq ki, bu da belə halların sayını azaldacaq.
11 yanvar tarixində Bakıda şagirdləri döyən məktəb direktoru Zinyət Əhmədovaya töhmət verilmişdir.
