Daxili İşlər Nazirliyinin Mətbuat Xidmətinin KİV və ictimaiyyətlə əlaqələr şöbəsinin rəisi Elşad Hacıyev bu gün, 10 dekabr tarixində qaçırıldığı deyilən 14 yaşlı qız barəsində məlumat paylaşıb.
“Şirvan şəhər sakini Tamella Mustafayeva 14 yaşlı nəvəsi A.A-nın narkotik istifadəçisi olan anası tərəfindən zorla Bakı şəhərinə aparılması, atalığı tərəfindən döyülməsi və polis tərəfindən şikayətə baxılmaması ilə bağlı sosial şəbəkələrdə iddialar səsləndirib”, - Elşad Hacıyevin paylaşımında qeyd olunub.
Hacıyev bildirib ki, hadisə ilə bağlı araşdırma tədbirləri görülüb, iddiaların təfərrüatı yoxlanılıb. Araşdırma zamanı məlum olub ki, nənə əsəb-nevroloji xəstəlikdən əziyyət çəkir və müvafiq səhiyyə orqanlarında rəsmi qeydiyyatdadır. Qızın atalığı tərəfindən döyülməsi, ananın narkotik istifadəçisi olması ilə bağlı iddialar isə öz sübutunu tapmayıb.
Yeniyetmə qız polis bölməsində anasının iştirakı ilə izahatı verib. Zorakılığa məruz qalmadığını, atalığını iki il müddətdən artıq olar ki görmədiyini bildirib. Hal-hazırda ana və qız Şirvan şəhərinə qayıdıblar.
“Bu gün yenidən ailə ilə əlaqə saxlanılıb, onları narahat edən hansısa neqativ halın olmadığını bildiriblər”, - DİN-nin nümayəndəsi qeyd edib.
Daha öncə, Şirvan rayon sakini Tamella Mustafayeva sosial şəbəkələrdə qızının narkoman olduğunu iddia edib. O bildirir ki, onun 14 yaşlı nəvəsi qızı və tanışları tərəfindən evdən oğurlanıb. Mustafayevanın sözlərinə görə, bu şəxslər yeniyetmə üçün 5 min manat almaq istəyiblər.
