Suraxanı rayonunda sakinlər kanalizasiya sisteminin olmamasından narazıdırlar. Bu haqda 25 fevral tarixində Aztv məlumat verib.
Hövsan qəsəbəsi, Ruslan Rəcəbov küçəsində kanalizasiya xətləri olmadığından sakinlər əziyyət çəkirlər. Onlar bildirirlər ki, yay aylarında ərazidə yayılan pis qoxudan burada nəfəs almaq mümkün olmur. Kanalizasiya sularının küçə ilə axması nəticəsində asfalt da sıradan çıxıb. Şamboların dolması nəticəsində borularda yaranan tıxanıqlığa görə çirkab sular evlərin zirzəmisinə sızır.
“Harada ki kanalizasiya, su xətti yoxdur, həmin ərazilərin tədbirlər planına salınması üçün rayon İH-nə müraciət etmişik, onlar isə müvafiq idarə və təşkilatlara müraciət göndərib. Hal-hazırda yol işləri davam etdirilir, bəzi küçələrdə kanalizasiya xətlərinin çəkilişinə başlanılıb”, - deyə Hövsan bələdiyyəsinin sədri Elbrus Xəlilov bildirib.
“Hal-hazırda Hövsan qəsəbəsinin əsasən çoxmənzilli yaşayış binaları olan hissəsində tullantı sularının infrastrukturu mövcuddur. Amma ətraf ərazilərdə, yeni salınmış massivlərdə, kənd Hövsanda ümumiyyətlə belə xətlər, şəbəkələr yoxdur. Amma baş plana əsasən dövlət büdcəsi hesabına gələcəkdə həmin ərazilərdə kanalizasiya infrastrukturunun qurulması planlaşdırılır”, - məsələ ilə bağlı Azərsu ASC açıqlama verib.
