Tikintisi XV əsrə aid edilən Divanxana İçərişəhərdə, Şirvanşahlar sarayının şimal-qərbində yerləşir.
Bina qapısının üzərində pozulmuş ərəbcə bir sətirlik kitabə mövcuddur. Arxeoloq Sısoyev həmin kitabədə şirvanşah I Xəlilullahın adını və hicri 832-ci (1428/9) il tarixini oxuduğunu iddia edirdi. Güman edilir ki, bu bina türbə olub. Bəzi mənbələrin məlumatına görə, cənazəsinin qalıqları Səfəvilər tərəfindən qəbirdən çıxarılıb yandırılan Xəlilullah orada dəfn olunub.
[Сысоев В. М. Баку прежде и теперь. Баку-1928]
[Aşurbəyli S. Şirvanşahlar dövləti. Bakı-2006]
Azərbaycanın orta əsr memarlığının araşdırıcısı Bretanitski 1956-cı ildə nəşr etdirdiyi kitabda da binanın xatirə tikilisi olduğunu yazmışdır. Onun fikrinə görə, XV əsrin sonlarında şirvanşah Fərrux Yasar özü üçün nəzərdə tutulmuş bu türbəni tikdirmişdir: “... mərkəzi kiçik memorial zalı və onun altında yerləşən yeraltı məbəddən məlum olur ki, qarşımızda memorial tikili var...”. Kitaba əsasən Divanxananın bu təyinatını əsas girişin üstündə yazılmış digər kitabənin məzmunu da təsdiq edir: “Allah dinclik evinə çağırır və istədiyini doğru yola yönəldir. Yaxşı davrananlara yaxşısı və daha üstünü verilir; onların üzlərini nə bir toz, nə də zillət bürüyər. Onlar cənnət əhlidirlər, orada həmişəlik qalacaqlar. Allah doğru buyurur”.
[Бретаницкий Л.С. Баку. Ленинград-Москва -1956]
Başqa şayiələrdə kitabənin məzmununa əsasən Divanxana adını “Sudilişe” – məhkəmə yeri kimi qeyd edilir. Versiyaya görə, ədalət əsas zalda həyata keçirilirdi, onun altında isə zindan yerləşirdi. Tamaşaçılar həyətdə yerləşən qalereyalarda məhkəmə prosesini seyr edirdilər. Ölüm hökmü qəbul edildikdən sonra cinayətkar dərhal edam edilirdi və onun başı əsas zalı zindanla birləşdirən dəlikdən göstərilirdi. Zindanı Xəzərlə birləşdirən yeraltı kanallar vasitəsilə cinayətkarın cənazəsi dənizə atılırdı.
[Сысоев В. М. Баку прежде и теперь. Баку-1928]
Bəzi tədqiqatçılara görə isə, Divanxananın təyinatı onun adında əks olunmuşdur. Onlara əsasən, sarayın qəbul otaqları burada yerləşirdi, hakimlərin və diplomatların qəbulları üçün divanxananın salonundan istifadə edilirdi. Orada yığcam heyətlə qanunlar və gizli qərarlar qəbul edilirdi.
[Aşurbəyli S. Şirvanşahlar dövləti. Bakı-2006]
Divanxana binasının yeraltı hissəsinin Şirvanşahların gizli saxlanc yeri olub, xəzinə üçün nəzərdə tutulması da ehtimal olunur.
[Сысоев В. М. Баку прежде и теперь. Баку-1928]
