Paytaxtın Səbail rayonu, Puşkin küçəsində olan dirəklərdə açıq naqillər qapaqlarla bağlanıb. Bu haqda AzTV reportaj hazırlayıb.
Bir neçə müddətdir ki, yol boyunca salınan işıq dirəklərinin naqillərinin bir hissəsi açıq vəziyyətdə olmuşdur. Həmçinin işıq dirəyinin aşağısını, yəni elektrik şəbəkə hissəsini örtən qapaqlar yerindən çıxarılmışdır. Bu da, xüsusilə uşaqlar üçün təhlükə yaradırdı.
Açıq qalan naqillər qeyri-sabit havada xüsusilə təhlükə yaratmışdır. Sakinlər də ən çox bundan narahatlığını bildirmişdir.
Mövcud vəziyyətlə bağlı Bakı şəhər İcra Hakimiyyəti dərhal reaksiya verərək problemi qısa bir zamanda aradan qaldırdı. Baş mühəndis Araz Paşayevin sözlərinə görə, şəhər üzrə mütəmadi olaraq monitorinqlər aparılır. Bəzi hallarda işıq dirəklərinin qapaqlarının oğurlandığı və yaxud sındırılaraq sıradan çıxdığı aşkar olunur. Bu faktla bağlı dərhal tədbirlər görülür. Belə ki, işıq dirəklərin oğurlanmış qapaqları yenisi ilə əvəz olunur. Oğurluqla bağlı hüquq mühafizə orqanlarına müraciət olunur.
