Son zamanlar havanın getdikcə istiləşməsi ilə Bakının mərkəzində vətəndaşların ilan sancması halları daha çox müşahidə olunur.
Belə ki, 3 may tarixində Elmlər Akademiyası ilə Memarlıq və İnşaat Universitetinin həyətində, hətta avtomobillərin belə üzərində ilanlara rast gəlinib.
Daha bir hadisə dünən Dənizkənarı bulvarda qeydə alınıb. Unikal.org -un məlumatına görə, qayalıqlar olan ərazidə bir neçə suilanı lentə alınıb.
Bakuplus.az komandası zəhərli və qeyri-zəhərli ilanları ayırd etmək, özünüzü və ailənizi ilanların təhlükəli təsirindən qorumaq üçün bir neçə qayda ilə tanış edir.
Hansı ilanlardan qaçınmaq lazımdır və onlarla harada qarşılaşa bilərsiniz?
Azərbaycanda ümumilikdə 28 növ ilan var, onlardan altısı zəhərlidir. Ən təhlükəlisi gürzədir. Gürzəyə Azərbaycanın bütün isti və quraq, aran və dağətəyi ərazilərində rast gəlinir. Bakının yaxınlığında ilanları, demək olar ki, hər yerdə görmək mümkündür, onlar hətta kanalizasiya borularından sürünərək çölə çıxır.
Zəhərli gürzəni suilanından necə ayırd etmək olar?
Zəhərli ilanların başının üçbucaqlı, suilanlarınkının isə oval formada olduğu hesab olunur. Lakin Azərbaycanda geniş yayılmış gürzə yalnız hücum zamanı başını sivri formada dəyişir. Abşeronda yayılan gürzəni arxa tərəfdəki ziqzaq naxışı və qısa, "doğranmış" açıq yaşıl quyruğuna görə ayırd edə bilərsiniz. Suilanları sərin, rütubətli yerləri xoşlayır. Bu ilanlar, həmçinin üzə bilirlər. Buna görə də onları Bakı çimərliklərində tez-tez görmək olar. Gürzələr isə əksinə, suyu sevmirlər, quru, boş yerlərə üstünlük verirlər.
İlan sancması ilə nə etmək olar və nə etmək olmaz?
Xəstəxanaya müraciət etməzdən əvvəl aşağıdakı tədbirləri görməlisiniz:
Yaradan qan udmaq, sıx sarğı tətbiq etmək, sancma yerini sürtmək və buz qoymaq olmaz. Xəstəyə qida və alkoqol içkiləri vermək qəti qadağandır. İlan sancmasından sağ qalmaq ehtimalı yüksəkdir, xüsusən də dişləmə ürəkdən uzaqda, ətraflarda olarsa.
Bağınızı ilanlardan necə qorumaq olar?
İlanların eşitmə orqanları olmadığı üçün səsləri eşitmirlər, lakin onlar torpaqdakı vibrasiyaya çox həssasdırlar. Buna görə də torpaq titrəməsinə səbəb olan qovucular ilanları da yaxşı dəf edir.
Sahədə vibrasiyalı qovucu quraşdıraraq gəmiricilərdən xilas olacaqsınız. Onlar isə ilanların əsas qidasıdır. Nəticədə yeməksiz qalan və vibrasiyanın təsirindən narahat olan ilanlar ərazinizi tərk edəcəklər.
Həmçinin ilanları qorxutmaq üçün ərazini herbisidlər və ya selitra ilə emal edə bilərsiniz. Bu maddələr ilanlar üçün xoşagəlməzdir, onlardan uzaq məsafəyə sürünməyə çalışacaqlar. Ancaq bunun üçün bağınızda ilan olmadığından tam əmin olmalısınız.
Bağınızda zəhərli maddələrdən istifadə etməyin, çünki onlar torpaq, ev heyvanları, quşlar və insanlar üçün təhlükəlidir.
