Abşeron rayonunun Qobu qəsəbəsində hamilə yoldaşını qətlə yetirən narkotik istifadəçisi olan şəxsin mahkəmə prosesi yekunlaşıb. Bu haqda bu gün, 23 fevral tarixində İctimai TV məlumat yayıb.
2020-ci il aprelin 29-da Abşeron rayon prokurorluğuna Qobu qəsəbəsi Xoşgəldin yaşayış massivində yerləşən fərdi evdə hamilə vəziyyətdə olan Leyla Bəkirovanın çoxsaylı bıçaq xəsarətləri ilə qətlə yetirilməsi barədə məlumat daxil olub. Keçirilən əməliyyat tədbirləri nəticəsində Leyla Bəkirovanın əri Anar Bəkirov şübhəli şəxs qismində saxlanılıb.
Dindirilmə zamanı Anar Bəkirov bildirib ki, 2014-cü ildə gələcək həyat yoldaşı ilə sosial şəbəkədə tanış olub. Bir müddət sonra məlum olub ki, gənclər bir-biri ilə qohumdurlar. Lakin buna baxmayaraq, üç ildən sonra, 2017-ci ildə onlar ailə həyatı qurublar.
Bəkirovun narkotik maddələri qəbul etməsindən sonra ailədə münaqişələr başlayıb. Münaqişələrin sonuncusu hamilə həyat yoldaşının öldürülməsinə səbəb oldu.
Təqsirləndirilən şəxsin qəribə hərəkətləri ilə bağlı ekspertiza təyin edilib. Tibb mütəxəssisləri onun anlaqsız olduğunu bildiriblər. Məhkəmə-narkoloji ekspertizanın rəyinə görə, Bəkirova asılılıq sindromu diaqnozu qoyulub.
Ekspertizanın rəyi əsasında Bakı Ağır Cinayətlər Məhkəməsi həbs edilməmə barədə qərar çıxarıb. Anar Bəkirov qətli anlaqsız vəziyyətdə törətdiyinə görə cinayət məsuliyyətindən azad olunub. Onun barəsində tibbi xarakterli məcburi tədbirlər görülüb.
Cütlüyün azyaşlı qız övladı qalıb.
