Yeni dərs ilinin başlamasına sayılı günlər qalıb. Ənənəyə görə, məktəbə hazırlıq son iki həftədən başlayır. Bu günlərdə valideynlər və şagirdlər özləri məktəb üçün lazım olan hər şeyi alaraq dərslərə hazırlaşırlar.
Bu il Bakı məktəblərində yeni məktəb forması tətbiq edilib, onu artıq satışda tapmaq olar. Bundan əlavə, valideynlər bütün lazımi dəftərxana ləvazimatlarını və yeni idman formasını almalı olacaqlar.
Dərs ili başlamazdan əvvəl ənənəvi məktəb yarmarkaları yaradılıb, burada pozandan tutmuş çantaya qədər hər şeyi almaq mümkündür. Yarmarkalar sentyabrın 25-nə kimi fəaliyyət göstərəcək. Məktəb əşyaları supermarketlərdə də artıq satışa çıxarılıb. Bəzi valideynlər ixtisaslaşdırılmış dəftərxana ləvazimatları mağazalarında alış-veriş etməyə üstünlük verirlər.
Bakuplus.az ixtisaslaşdırılmış yarmarkalarda, supermarket və dəftərxana ləvazimatları mağazalarında məhsul alarkən istehlak səbətinin dəyərini öyrənmək üçün 2022-ci ildə məktəbə hazırlığın nə qədərə başa gələcəyini hesablayıb.
Müqayisə məqsədilə ibtidai sinif şagirdləri üçün əsas ləvazimatlar seçilmişdir. Onların qiymətlərini “Gənclik” metrosunun yaxınlığındakı məktəb yarmarkasında, “Bravo” supermarketində və “Ofisait” dəftərxana ləvazimatları mağazasında öyrəndik.
Belə ki, məktəb çantası, 10 ədəd 12 vərəqli dəftər və dəftər üzlükləri, rəsm albomu, gündəlik, qələm, sadə karandaş, rəngli karandaş dəsti, flomaster dəsti, pozan, xətkeş, penal, qayçı, plastilin, rəngli kağız və yapışqandan ibarət olan dəst məktəbli yarmarkasında 39.5 manat, “Ofisait” mağazasında 36.45 manat təşkil edir. “Bravo” supermarketində ləvazimatları 39.44 manata almaq olar, lakin bu qiymətə gündəlik daxil deyil. Hazırda mağaza şəbəkəsində həmin məhsul mövcüd deyil.
[caption id="attachment_62769" align="alignnone" width="800"]
Foto BakuPlus.az[/caption]
Daha öncə yeni məktəbli formasının qiymətləri də məlum olub - 3 və yaxud 4 elementdən ibarət olan geyim dəsti valideynlərə 55-65 manata başa gələcək. Lakin onu da qeyd edək ki, ötən ildən köhnə formada olan şagirdlər bu il onu dərslərə geyinə bilərlər.
İdman ayaqqabısı ilə birlikdə idman formasının qiyməti orta hesabla 50-60 manat təşkil edəcək.
Müəllimə dərslərin başlanması şərəfinə hədiyyə olaraq gül dəstəsi gətirmək Bakıda hörmətlə qarşılanan köhnə ənənədir. Məcburi olmasa da, bir çox valideynlər buna diqqət yetirirlər. Orta hesabla bir buket gül 20-50 manata başa gələcək.
Gül və məktəb ləvazimatlarının qiymətlərinin dərslərin başlanmasına yaxın artacağı gözlənilir. Mütəxəssislər başlanğıcda yalnız zəruri olanları almağı məsləhət görürlər, çünki ajiotaj keçdikdən sonra məktəb mallarının qiyməti 10-20 faiz ucuzlaşacaq.
Məktəb və idman formaları, dərs ləvazimatları və güllərdən ibarət komplekt bu il valideynlərə bir uşaq üçün 170-180 manata başa gələcək.
