Bakı məktəblilərinin psixoloji pasportları hazırlanacaq. Bu haqda BakuPlus.az Bakı Şəhər Təhsil İdarəsinə istinadən bu gün, 3 fevral tarixində xəbər verib.
Son zamanlar paytaxt məktəblərində şagirdlərin yol verdikləri neqativ hallar səbəbindən onların psixoloji durumunu nəzarətdə saxlayan mexanizm hazırlanır.
Bakı Şəhəri üzrə Təhsil İdarəsinin Təlimə Dəstək Mərkəzinin direktoru İlkin Həsənov deyir ki, məktəblərdə tədris prosesi təkcə şagirdlərin akademik biliklərinin artırılmasından ibarət deyil. Onun sözlərinə görə, təhsil ocaqlarında eyni zamanda məktəblilərin psixoloji durumu da nəzarətdə saxlanılmalıdır.
İ. Həsənov qeyd edib ki, layihənin icrası ilə bağlı işlərə bir neçə ay bundan əvvəl start verilib. Psixoloji pasportlarda aparılan qeydlər gizli saxlanacaq.
Pasportlar məktəb direktoru, sinif rəhbəri və psixoloqun şagird haqqında məlumatları əsasında formalaşdırılacaq.
Layihə ilkin olaraq paytaxt məktəblərində təhsil alan şagirdləri əhatə edəcək.
