Nərimanov rayonunda yaşayış binasının fasad üzlüyü qoparaq sakinlərə təhlükə yaradır. Bu haqda Xəzərxəbər məlumat verib.
Ziya Bünyadov prospektində 6-7 il əvvəl binanın fasadına çəkilmiş betonopan adlı xüsusi üzlük qoparaq tökülür. Sakinlərin sözlərinə görə, olduqca sərt olan bu material kiminsə üzərinə düşsə, həmin şəxs ağır xəsarət ala bilər. Bina 9 mərtəbəli və 5 girişli olduğu üçün təhlükənin miqyası daha da böyüyür.
Məsələ ilə bağlı Nərimanov rayon İcra Hakimiyyəti bildirib ki, bina onların yox, rayon Mənzil Kommunal Təsərrüfatı Birliyinin balansındadır.
“Hava şəraitinin küləkli keçməsi nəticəsində üzlüklərdə qopmalar müşahidə edilir. Biz bu ünvanların siyahısı tərtib erdik. Aidiyyatlı qurumlara göndərmişik ki, bu işlərə yenidən baxılsın və problemlər aradan qaldırılsın. Qopma riski olan üzlüklər müəyyən edilərək çıxarılır,”- Mənzil Kommunal Təsərrüfatı Birliyinin baş mühəndisi Azər Rzayev açıqlama verib.
