Bakının Nizami rayonu, Elşən Süleymanov küçəsi 72 A ünvanında yerləşən park hasara alınıb. Bu haqda bu gün, 11 noyabr tarixində Bakuplus.az Oxu.az-a istinadən xəbər verir.
Sakinlərin sözlərinə görə, parkın əvəzinə restoranın tikintisi planlaşdırılır. Əlavə olaraq vətəndaşlar qeyri-iş günləri olduğu səbəbdən, Nizami Rayon İcra Hakimiyyətindən məsələ ilə bağlı məlumat ala bilməyiblər.
Azərbaycan Respublikasının Dövlət Şəhərsalma və Arxitektura Komitəsinin tərəfindən sözügedən əraziyə baxış keçirilərək parkın hasara alınması faktı aşkarlanıb. Nəticədə tikinti işləri dərhal dayandırılıb.
Nizami Rayon İcra Hakimiyyətindən isə bildirilib ki, məsələ aydınlaşdırılacaq və əlavə məlumat veriləcək.
