Pasientlər 4 saylı Bakı Şəhər poliklinikasından şəkər dərmanlarını vaxtlı-vaxtında ala bilmədiklərinə görə narazıdırlar. Onlar iddia edir ki, bu ilin əvvəlindən dərmanların verilməsində ciddi ləngimələr yaşanır, mart ayının əvvəlindən isə ümumiyyətlə dərman ala bilmirlər. Bu haqda Xəzər Xəbər reportaj hazırlayıb.
4 saylı poliklinikanın nəzdində fəaliyyət göstərən imtiyazlı aptekdə pulsuz dərman üçün gələn hər kəs eyni cavabı eşidir: dərman yoxdur. Aptekin müdiri də təsdiq edir ki, tələbata uyğun sayda dərman göndərilmədiyi üçün bu ilin əvvəlindən başlayan pulsuz dərman çatışmazlığı indi daha çox hiss olunur.
“Dərman az miqdarda gəlib, ayın 3-də almışıq. Olub, qurtarıb, indi də sifariş verib gözləyirik. Iki həftədir ki, yoxdur”, - aptekin müdiri bildirib.
Şəkərli diabet xəstələrinin pulsuz dərmanla təminatında yaranmış problemlə əlaqədar İcbari Tibbi Sığorta üzrə Dövlət Agentliyindən bildirildi ki, hazırda qeydiyyatda olan şəkərli diabet xəstələri ilə yanaşı, ilin sonuna qədər yeni qeydiyyata alınacaq xəstələrin də ehtiyacları nəzərə alınaraq tender keçirilib. Qısa müddət ərzində bütün dövlət tibb müəssisələrinin şəkərli diabetlə bağlı dərman preparatları ilə təminatı həyata keçiriləcək. Artıq təchizatçılarla müqavilə bağlanıb və təchizata başlanılıb.
