Paytaxtda hündürmərtəbəli binalarda avtomobillər üçün qarajlar mənzillərdən bahadır. Bu barədə bu evlərin sakinləri bildirir. Onların sözlərinə görə, belə qarajların sayı da məhduddur, və hər kəsə yer çatmır. İş adamları yaranmış vəziyyətdən istifadə edərək qiymətləri daha da artırır. Bu haqda Xəzər Xəbər reportaj hazırlayıb.
Yeni tikililərdə yaşayan sakinlərin sözlərinə görə, mənzillərin kvadrat metrinin qiyməti 1500 manatdan, qarajın qiyməti isə 2000 manatdan başlayır.
Əmlak eksperti Ramil Osmanlı deyir ki, bir çox evlərdə texniki hesab olunan birinci qat qaraj üçün ayrılıb. Əslində isə qaraj ayrı bir mərtəbədə tikilməlidir və sakinlər ondan istifadə etmək üçün pul ödəməli deyillər: “Tikinti şirkətlərinə 1 mərtəbədən artıq nəzərdə tutulan qaraj sahələrinin layihələndirilməsinə görə güzəştlər olur. Yəni, pul alınmır. Eyni zamanda vergi güzəştləri də nəzərdə tutulur. Bu da ona görədir ki, parklanma, ümumiyyətlə nəqliyyat infrastrukturunun təmin olunması baxımından buna ehtiyac böyükdür. O binalarda qaraj sahələrinin verilməsi mümkündür, amma binaların bir çoxunda qaraj sahələrinin bir kvadrat metrinin dəyəri bəzi hallarda mənzil dəyərindən yüksək olur”.
Ekspertin fikrinə görə, süni qiymət artımının əsas səbəblərindən biri parkinq yerlərinin az olmasıdır. Belə olan halda sürücülər təklif olunan qiymətlə razılaşmaq məcburiyyətində qalırlar. Lakin, problem bununla bitmir. Bir çox hallarda vətəndaşa pul müqabilində çıxarış və ya digər sənəd verilmir və nəticədə qarajın taleyi sual altında qalır.
Vəkillər Kollegiyasının üzvü Bəylər Məmişov deyir ki, digər daşınmaz əmlak növləri kimi, qaraj sahəsi alınarkən və ya satılarkən vətəndaşa çıxarış verilməlidir. Vəkil onu da bildirib ki, qarajı satan tərəf vətəndaşa müvafiq sənədləri təqdim etməsə, o, qanunla müəyyən edilmiş qaydada məsuliyyətə cəlb oluna bilər.
