Son zamanlar paytaxt ərazisində hibrid avtomobillərin sayında artım müşahidə olunur. Bu artımın nəticəsi olaraq 2022-ci ildən bu tip avtomobillərin bir qisminin alışı zamanı vergi odənişi tələb olunmur. BakuPlus.az sizin üçün kiçik araşdırma aparıb.
Avtomobillərin atmosferə buraxdığı zəhərli maddələr ekologiyanı korlamaqla yanaşı insan orqanizmində bir çox xəstəliklərin ortaya çıxmasına da zəmin yaradır.
Bu səbəbdən Avropa ölkələri, Yaponiya, ABŞ və digər dövlətlər atmosferə zərər verməyən elektromobil və hibrid avtomobillərin istehsalını artırırlar. Qeyd olunan avtomobillər təbiətə vurulan zərəri azaltmaqla yanaşı, sürücülərin də xərcini minimuma endirir.
Müqayisə üçün qeyd edək ki, ənənəvi mühərriklə işləyən 2400 kub santimetr mühərrikli "Toyota RAV4" avtomobili 100 km-ə 10 litr yanacaq sərf etdiyi halda, hibridlə işləyən 2500 kub santimetr mühərrikli "Toyota RAV4" 100 km-ə 4,5 litr yanacaq sərf edir.
Yerli bazarda bir çox dünya brendlərinin hibrid və elektrik mühərrikli avtomobillərini tapmaq mümkündür. Avtomobil satışını həyata keçirən saytlarda 9000 manatdan başlayan qiymətlərlə hibrid avtomobillərini əldə etmək olar.
Hazırda Bakıda satışda olan ən bahalı hibrid mühərrikli avtomobil “Porsche” markasına məxsus “Panamera” modelidir. Onun qiyməti 159.000 ABŞ dollarıdır.
Bundan əlavə, paytaxt salonlarında satışda “Volkswagen”, “Audi”, “Nissan” və “Mercedes” kimi tanınmış markaların da tam elektrik mühərrikli avtomobilləri mövcuddur.
2022-ci il yanvarın 1-dən etibarən istehsal tarixi 3 ildən, mühərrikinin həcmi isə 2500 kubsantimetrdən çox olmayan hibrid avtomobillərin Azərbaycana idxalı və satışı zamanı 3 il müddətində vergi ödənişi tələb olunmayacaq.
