Hündürmərtəbəli binalar tikilərkən bir çox normativlər kobud formada pozulur. Belə tikililər əsasən paytaxtın Nərimanov və Xətai rayonlarında üstünlük təşkil edir. Bu haqda Space TV reportaj hazırlayıb.
Binaların ara məsafəsi düzgün hesablanmır, həyətyanı sahələr kiçildilir, yaşıllıq üçün ayrılan ərazilərdə tikinti işləri aparılır və s.
Qanunvericilikdə hündürmərtəbəli binaların inşası zamanı digər bina ilə ara məsafəsi təxminən 15-20 metr nəzərdə tutulur. Nazirlər kabinetinin qərarına əsasən inşa edilən binaların layihələrində tikinti meydançasının yalnız 40%-i yaşayış üçün nəzərdə tutulub. Qalan sahədə isə parklar, dayanacaqlar, uşaq meydançaları və digər xidmətlər olmalıdır.
Paytaxtda isə bəzən bir bina üçün nəzərdə tutulan ərazidə 2 binanın inşası həyata keçirilir.
Əmlak eksperti Elnur Fərzəliyev bildirib ki, şəhərsalma normativlərində binalar arası məsafə binanın hündürlüyü və onun yarısı qədər olmalıdır. Bu həm binaların günəş enerjisi ilə işıqlanmasına, həmçinin hər hansı bir qəza, zəlzələ hadisəsi baş verərsə, bir binanın digər binaya fəsad verməməsi üçün və ara məsəfəsinin qorunması üçün nəzərdə tutulub.
Fərzəliyev həmçinin qeyd edib ki, binaların bir-birinə daha sıx tikilməsinin səbəblərindən biri ondan ibarətdir ki, bu gün paytaxt ərazisində torpaq sahələrinin qiymətləri həddindən artıq bahadır. Və tikintiyə yararlı torpaq sahələrinin sayı məhdud, qiymətləri isə baha olduğundan, tikinti şirkətləri məcburən binaları bir birinə yaxın ərazilərdə tikirlər.
Belə sıx tikintidən həkimlər də narahatdır. Həkim Yeganə Cəfərovanın sözlərinə görə, günəş şüasının birbaşa qarşısı alınır və maneələr törədilir. Bu, birbaşa olaraq D vitamininin orqanizmə sovrulmasına mane olur. Uşaqlarda daha çox rast gəlinən revmatizm kimi xəstəliklər zamanı D vitaminini günəş işığından qəbul etmək çox faydalıdır.
