Bakı küçələrində gecələyən və “patı” aludəçisi olduğu iddia edilən yeniyetmə Respublika Narkoloji Dispanserinə aparılıb. Bu haqda bu gün, 15 yanvar tarixində Report Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğluya istinadən məlumat verib.
Həmin yeniyetmənin 15 yaşlı Ruslan Məmmədov olduğu müəyyən edilib. Həyata keçirilən tədbirlər nəticəsində uşaq tapılıb və müvəqqəti olaraq Respublika Narkoloji Dispanserinə yerləşdirilib.
Dövlət Komitəsinin nümayəndəsi bildirib ki, Məmmədovun 15 gün ərzində dispanserdə müayinə və müalicəyə cəlb olunması ilə bağlı qərar verilib: "Ruslan Məmmədov bundan əvvəl də dəfələrlə səhiyyə ocağına yerləşdirilib, lakin buna baxmayaraq o, tibb müəssisəsini tərk edib".
