Paytaxtın tanınmış memarları və istedadlı qənnadıçıları tərəfindən hazırlanmış “Karabakh - Winter Wonderland” instalyasiyasını ziyarət etməyə hələ də vaxt tapmamısınızsa, tələsin - sərginin bağlanışına cəmi 6 gün qalıb. Bu haqda Bakuplus bu gün, 7 yanvar tarixində məlumat verir.
“Karabakh - Winter Wonderland” Azərbaycanın Vətən Müharibəsindəki parlaq qələbəsinin simvolu olan xarıbülbül çiçəyi şəklində hazırlanmışdır. Məşhur azərbaycanlı memarlar, mühəndislər və paytaxtın istedadlı şirniyyatçıları Şuşa qalasının divarlarından Ağdam məscidinə və Xudafərin körpüsünə qədər Azərbaycan mədəniyyəti abidələrinin şirin miniatürlərini, eləcə də Füzuli aeroportu kimi yeni tikililəri və Bakı şəhərinin görməli yerlərini ucaltmışlar.
İnstalyasiyada 80 kq un, 15 kq yağ, 330 yumurta, 20 kq şokolad, 200 kq marzipan, 250 kq aysinq, 15 kq bal, 3 kq zəncəfil tozu və digər şirniyyatlar istifadə olunub. 40-dan çox marzipan heykəlcikləri, 30 zəncəfilli ev, 100-dən çox zəncəfil ağacı və beş böyük yolka əl işi ilə hazırlanaraq quraşdırılıb. Evlərdə işıqlar yanır, dönmə çarxı fırlanır və yüzdən çox zəncəfilli çörəkli adamlar şəkərlə tozlanmış küçələrdə gəzir.
Sərgi Nargis Fondunun təşəbbüsü ilə Port Baku Mall-un 1-ci mərtəbəsində 13 yanvar tarixinədək təşkil olunacaq, giriş sərbəstdir.
[URIS id=28795]
