Sədərək və Binə ticarət mərkəzlərində sürücülərdən 2 dəfə ödəniş alınır. Bu haqda ATV televiziya kanalı reportaj hazırlayıb.
Sədərək və Binə ticarət mərkəzlərinə daxil olanda 1 manat, çıxanda 50 qəpik ödəniş istəyirlər.
İş günləri, əsasən də həftə sonları paytaxtın ən böyük ticarət mərkəzlərindən olan Binə və Sədərəyə xeyli sayda avtomobil daxil olur. Və bunun müqabilində çıxışda 50 qəpik tələb olunur.
Lakin ödəniş sadəcə bununla bitmir. Ərazidə özünü “parkovşik” kimi təqdim edən işbazlar daxil olar-olmaz sürücünün qarşısını kəsərək pul istəyirlər. Həmin şəxslər bunu müdiriyyətin adından etdiklərini desələr də, ticarət mərkəzinin çıxışında tam başqa məlumat verilir.
Məsələ ilə bağlı hər iki bazar rəhbərliyi bildirib ki, sözügedən şəxslərin əməlləri ilə bağlı məlumatsızdırlar və mövcud faktla bağlı qısa zamanda tədbir görüləcək.
Bazar ərazisində avtomobildən istifadə etməyə görə ödəniş məbləği 50 qəpikdir və sürücülər əlavə heç kimə pul ödəməli deyillər.
