"Azərsu" ASC Bakının Suraxanı rayonunda yeni layihənin icrasına başlayıb. Bu haqda 13 dekabr tarixində “Azərsu” ASC xəbər verib.
Suraxanı rayonunda əhalinin tullantı sularının axıdılması istiqamətində yeni layihəyə start verilib. Layihəyə əsasən Əmircan qəsəbəsi Atamoğlan Rzayev küçəsində tullantı sular ekoloji tələblərə uyğun idarə olunacaq, həmçinin yağıntılar zamanı subasma halların qarşısı alınacaq.
Bu küçədə mərkəzləşdirilmiş kanalizasiya şəbəkəsi olmadığından, tullantı suları əhali tərəfindən fərdi qaydada çəkilirdi. Həmçinin Atamoğlan Rzayev küçəsi çökək ərazidə yerləşdiyindən yağıntılar zamanı tez-tez subasma halları baş verirdi.
Bu problemləri aradan qaldırmaq məqsədi ilə “Azərsu” ASC tərəfindən layihə hazırlanıb. Layihəyə əsasən müxtəlif diametrli borularla 1,3 km uzunluğunda tullantı su xətləri inşa edilir. Yeni yaradılan şəbəkədən 1000-dək ünvana birləmə veriləcək. Eyni zamanda yeni şəbəkə yaxınlıqdan keçən 500 mm diametrli mövcud kollektora birləşdiriləcək.
Bu layihə əhalinin məişət şəraitini yaxşılaşdıracaq və ərazidə ekoloji təhlükəsizliyi təmin edəcək.
[URIS id=19905]
