Paytaxtın Suraxanı rayonunda içməli sudan qanunsuz istifadə halları aşkarlanıb. Bu haqda bu gün, 22 dekabr tarixində Azərsu ASC-nin mətbuat xidməti məlumat yayıb.
Hövsan qəsəbəsi, Oqtay Şabanov küçəsində yerləşən “Gəncə təndiri” çörək sexi, ət kəsimi məntəqəsi, Al və OBA marketlər şəbəkəsinin obyektlərinə içməli suyun sayğacdan kənar çəkildiyi aşkarlanıb.
Əmircan qəsəbəsi, Atamoğlan Rzayev küçəsindəki qum bazarında və Yeni Günəşli qəsəbəsi, AB98 ünvanında ət kəsimi kimi fəaliyyət göstərən qarajda da qanun pozuntuları aşkarlanıb.
Həmçinin, qəsəbənin Bəydəmirov küçəsində sudaşıyan avtomobilin sahibi fərdi yaşayış evinə quraşdırılan xəttdən küçəyə boru çəkərək, sudaşıyan nəqliyyat vasitəsini doldurub satışı ilə məşğul olduğu məlum olub.
Özbaşına çəkilmiş xətlər və qoşulmalar ləğv edilib, dəymiş ziyan hesablanıb.
Cari ilin yanvar - noyabr aylarında içməli sudan qanunsuz istifadə ilə bağlı Suraxanı rayonu üzrə 697 fakt aşkarlanıb, 206 min kubmetr həcmində sərfiyyat bərpa olunub.
[URIS id=21338]
