Evin təmizlənməsi çox vaxt enerji və diqqət tələb edən yorucu bir iş ola bilər. İşə, ailənizə və dostlarınızla görüşlərə daha çox vaxt ayırmaq istəyirsinizsə, mənzilinizin təmizliyini xüsusi şirkətlərə həvalə edə bilərsiniz.
Paytaxtda fəaliyyət göstərən bu şirkətlər və onların təklif etdikləri xidmətlər haqqında öyrəndik. Standart paketi müəyyən etmək üçün pəncərələrin yuyulması və mənzilin ümumi təmizlənməsi üçün qiymətləri ayrıca araşdırdıq.
Şirkətlərdən bəzilərinin qiymət və xidmətlərinin siyahısını sizə təqdim edirik:
Service Plus Group şirkəti müştərilərinə mənzillərin, ofislərin, bağ evlərinin təmizlənməsi, bağban, usta xidmətləri, həmçinin kimyəvi təmizləmə və xalçaların yuyulmasını təklif edir.
Ümumi təmizliyin qiyməti təmizlik sahəsinə görə dəyişir. Orta hesabla 1 kvadratmetr üçün qiymət 1,5-1,7 manatdır.
Qeyd olunan qiymətə döşəmə, tavan, divarların, daxili qapı və pəncərələrin silinməsi, mebellərin tozlarının alınması, mətbəx, kiçik məişət avadanlıqlarının, sanitar qovşağın təmizliyi, kafel, metlaxın ərpdən təmizlənməsi, eyvanın təmizliyi, aspirator (havaçəkən), çilçıraqlar, radiatorların daxilinin buxar ilə təmizlənməsi, divarların yağ ləkələrindən, qara çirklərdən təmizlənməsi daxildir.
Təmizlik ləvazimatları və avadanlıqlar qiymətə daxildir.
Qiymətə pəncərə təmizliyi daxil deyil. Bir pəncərənin yuyulmasının qiyməti ölçüsündən və çirklənmə dərəcəsindən asılı olaraq orta hesabla 15-20 manat təşkil edir.
Şirkət mənzil, ofis, bağ evləri, restoranlarda gündəlik, əsaslı, inşaat və yaxud təmirdən sonrakı təmizlənməni təklif edir. Həmçinin yumşaq mebel, pərdələr və xalçaların yerində yuyulması, buxar aparatı ilə dezinfeksiyası da mövcuddur.
Qiymət təmizlik sahəsindən asılıdır, 1 kv.m üçün orta hesabla 1-1,3 manatdır. Təmizləyici maddələr və avadanlıqlar şirkət tərəfindən verilir.
Ümumi təmizləmə xidmətlərinə tavanların, döşəmələrin, divarların yuyulması, çilçıraqların təmizlənməsi, hamamın və mətbəxin, o cümlədən ərp və yağ ləkələrinin təmizlənməsi daxildir. Mütəxəssislər pərdələri çıxaracaq, yuyacaq və yerinə asacaqlar. Pəncərələrin yuyulması qiymətə daxil deyil. Bir pəncərənin yuyulması 5 manat təşkil edir.
Titiz şirkəti evlərin və ofislərin təmizliyi, dezinfeksiya, dezinseksiya, deratizasiya və ilanlara qarşı dərmanlama xidmətlərini təklif edir.
Ümumi təmizliyin 1 kvadratmetr üçün qiyməti 1,6 manatdır.
Xidmətlərə aşağıdakılar daxildir: mebelin, oturacaqların və əşyaların silinməsi, döşəmənin süpürülməsi və silinməsi, pəncərələrin içəridən və xaricdən yuyulması, mətbəx şkaflarının və mətbəx qablarının təmizlənməsi, hamam şkaflarının və digər hissələrinin təmizlənməsi, vanna otağında şüşə və güzgü səthlərinin yuyulması, vannaların təmizlənməsi və santexnika dezinfeksiyası, döşəmənin nəm təmizlənməsi, zibillərin yığılması və atılması.
Bundan əlavə, şirkət sizə xüsusi təmizlik ehtiyaclarınızı ödəmək üçün tam çeşidli xidmətlər təklif edir. Lazımlı olan hər bir vasitə şirkət tərəfindən qarşılanır, istifadə vasitələri ödənişə daxildir.
Clean Heart şirkəti təmizləmə və dezinfeksiya sahəsində geniş spektrli fəaliyyət həyata keçirir. Təmizləmə və dezinfeksiya ilə yanaşı, şirkət işçilərin təlimi, sənaye alpinizmi xidmətlərini göstərir.
Mənzilin təmizlənməsinin dəyəri sahəsindən asılıdır - 1 kvadratmetrə görə qiymət 1,35 manat təşkil edir.
Ümumi təmizlənmə mənzilin tamamilə bütün sahələrinin - otaqlarının, mətbəxinin və vanna otağının hərtərəfli təmizlənməsini əhatə edir. Otaqlarda bütün səthlər təmizlənir - tavan, divarlar və döşəmə, həmçinin mebel, lampalar və daxili əşyalar. Bu səthlərdə bütün növ çirklənmələrdən - köhnələr də daxil olmaqla, dərin təmizləmə aparılır. Qiymətə mənzildə pəncərələrin yuyulması da daxildir.
Bütün təmizləyici vasitələr və avadanlıqlar şirkət tərəfindən təqdim olunur.
EcoMan şirkəti təmizləmə işlərini, otaqların (mənzillər, ofislər, evlər) ümumi təmizlənməsini təşkil edir. Evlərin və ofislərin təmizlənməsi, pəncərələrin yuyulması, divan və kresloların təmizlənməsi, döşəməyuma, xalçayuma, xadimə xidməti təklif olunur.
Bu şirkətin xidmətlərinin dəyəri binanın növündən asılıdır. Yeni tikili binada təmizlik 1 kvadratmetr üçün 1,8 manat, köhnə tikili binada isə eyni sahə üçün 2,3 manat təşkil edəcək.
Şirkətin işçiləri tərəfindən mənzildə təmizlik işləri bütün səthlərə diqqət yetirilərək görülür - quru və nəm təmizləmə aparılır, çilçıraqlar, metal və şüşə səthlər, o cümlədən pəncərələr yuyulur.
Bütün prosedurlar, müxtəlif məkanların təmizlənməsi ən müasir avadanlıqların və kimyavi maddələrin köməyi ilə həyata keçirilir.
Şirkətin qiymətləri işin mürəkkəbliyindən, məsafə uzaqlığından və əlavə xidmətlərin sifarişindən asılı olaraq dəyişə bilər. Dəqiq məlumat üçün təmizlik şirkətinin meneceri ilə məsləhətləşməlisiniz.
